Osy kezdesý sheńberinde QR Prezıdenti N.Á.Nazarbaevtyń baǵdarlamalyq maqalasynyń negizgi ıdeologııalyq baǵyttaryn talqylap, rýhanı jańǵyrý jáne Qazaqstan halyqtarynyń aldaǵy ýaqyttaǵy mádenıetiniń damýy týraly keleli oılar aıtyldy. Akademık, fılosofııa ǵylymdarynyń doktory, professor Á.N.Nysanbaev «Mádenı mura» baǵdarlamasy aıasynda shyqqan álemdik fılosofııa eńbekteriniń mańyzdylyǵyna toqtalyp, sonymen qosa qazaq fılosofııasyn da aldyńǵy qatarly zertteý eńbekterine engizip, óz dárejesinde zertteý kerektigin aıtty. Fılosofııa, saıasattaný jáne dintaný ınstıtýtynyń dırektorynyń mindetin atqarýshy, fılosofııa ǵylymdarynyń doktory, professor S.E.Nurmuratov; ál-Farabı atyndaǵy QazUÝ fılosofııa jáne saıasattaný fakýltetiniń professory, fılosofııa ǵylymdarynyń doktory T.H.Ǵabıtov, fılologııa ǵylymdarynyń kandıdaty, dosent T. Álibek sóz sóılep, Elbasy maqalasyndaǵy ǵylym, bilimge qatysty tarmaqtardy jan-jaqty saralap, sońǵy sóz asyqpaı, mızandap sheshim shyǵarýdy usyndy. Qazirgi kezde qazaq ǵylymy, fılosofııasy qarqyndy zertteýlerdi qajet etedi. Toqtap qalmasa da, tolyq, túbegeıli zertteýler júrgizilmegendikten, álemge aýdarylar qazaq kitaptaryn da uzaq talqydan ótkizýge týra keledi. Al álemge synar qazaq rýhanııatynda shyn máninde laıyqty shyǵarmalar kóp-aq. Ol meıli halyq aýyz ádebıeti úlgilerinen bolsyn, avtorlar shyǵarmashylyǵynan bolsyn, solaı aıtýǵa ábden bolady. «Mádenı mura» baǵdarlamasy aıasynda shyǵarylǵan júz tomdyqtardyń bári ýnıversıtet kitaphanalaryna túsken. Bul memleket tarapynan jasalǵan úlken kómek, ǵalymdardyń eńbegi. Álem fılosofııasynyń júz tomdyǵyn aýdarǵan ǵalymdardyń eńbekterin de joqqa shyǵarýǵa bolmaıdy. Biraq sol aýdarylǵan júz tomdyqtyń bári óz deńgeıinde kásibı túrde aýdarylmaǵany anyq. Elbasynyń baǵdarlamalyq maqalasyndaǵy tapsyrmalary naýqanǵa aınalyp ketpeı, naqty úzdik shyǵarmalar usynylyp, tyńǵylyqty jumystar istelýi tıis. Eshqandaı kózboıaýshylyq árekettiń oryn almaýy qazirgi kúni basty nazarda. Bul «Jańa 100 esimge» de, alty tilge aýdarylatyn qazaq shyǵarmalary men qazaqsha aýdarylatyn shetel kitaptaryna da qatysty másele. Ǵalymdar usynystaryn mınıstrlikke joldap, ártúrli bas qosýlar men jıyndarda óz oılaryn ortaǵa salyp, Elbasy maqalasyndaǵy tapsyrmalarǵa atsalysatyndaryn bildirdi.
Baǵashar TURSYNBAIULY «Egemen Qazaqstan», ALMATY